पावती

तुझ्या फोटोंसारखीच
तुझी सगळी पत्र केव्हाच
फाडून, तुकडे करुन
फेकून दिली

तू माझ्यासाठी घेतलेल्या
पर्फ्युमची पावती मात्र
जीवापाड जपली आहे
त्या पावतीवर
इतरांना दिसते
ती किंमत, दुकानाचं नाव
इतकंच काय
खरेदीची वेळही नोंदवलेली

तुझी सगळी पत्रं
केव्हाच
इतिहासात जमा झाली आहेत
पण मी आजही
ती पावती 'वाचतो'
तुझ्या पत्रांसारखी

- - - - - - - - - - - - - - - - - - - - - - - - - - - - - - - - - - - - - - - - - - - - - - - - - - -
जालरंग प्रकाशनाच्या दिवाळी अंकात पूर्वप्रकाशित
- - - - - - - - - - - - - - - - - - - - - - - - - - - - - - - - - - - - - - - - - - - - - - - - - - -

पत्र

तुला पत्र लिहिताना
'काय' लिहावं

असा प्रश्न कधी पडला नाही

आणि 'किती' लिहावं

याचं भान कधी राहिलं नाही

आज मात्र

नेहमीपेक्षा वेगळंच घडलंय......

अजून कागदावर

एकही अक्षर

उमटलं नाहीये हे......

पानभर लिहून झाल्यावर

लक्षात आलंय

...आणि तू हे न लिहीलेलं पत्र

पोहोचलं म्हणालीस?